काठमाडौं, पुस ५ । भक्तपुरको मध्यपुरठिमी नगरपालिका–९ निकोशेरास्थित विश्वकृष्ण धौबन्जारको खाली कच्ची घरमा हाल नाम, थर, वतन नखुलेका करिब ४० वर्षीय पुरुष सोमबार मृत अवस्थामा फेला पर्नुभएको छ । मादक पदार्थ सेवन गरी आएर ढोकाको चुकुल नलगाई सुतेको अवस्थामा उहाँ मृत फेला पर्नुभएको हो ।

रुकुम (पश्चिम) को मुसिकोट नगरपालिका–२ रातामाटा बस्ने ३० वर्षीय बिजय परियार सोही नगरपालिका–१ पातीहाल्नेस्थित बाटोमा सोमबार मृत अवस्थामा फेला पर्नुभएको छ ।

यसैगरी नवलपरासी (पूर्व)को सरावल गाउँपालिका–६ घर भई हाल कावासोती नगरपालिका–१७ गोछडा डेरा गरी बस्ने ५२ वर्षीय वीरेन्द्र कुमार चौधरी आफ्नै कोठामा सुतिरहेको अवस्थामा सोमबार मृत फेला पर्नुभएको छ । उहाँ सोही ठाउँस्थित सरस्वती उमाविका शिक्षक भएको बुझिएको छ । यस सम्बन्धमा प्रहरीले थप अनुसन्धान गरिरहेको छ ।