काठमाडौं, पुष १३। सहिद स्मारक ए डिभिजन लिगको छैटौं चरणको अन्तिममा डिफेन्डिङ च्याम्पियन मछिन्द्र फुटबल क्लव फेरि शीर्ष स्थानमा उक्लेको छ ।

चौथो चरणको समाप्तीमा पनि मछिन्द्र पहिलो स्थानमा थियो । तर, पाँचौं चरणमा भने मछिन्द्रलाई मनाङ मर्स्याङ्दीले उछिनेको थियो । अब फेरि मनाङलाई उछिनेर मछिन्द्र शीर्ष स्थानमा आएको छ ।

मनाङसँगै लिगमा अब तीन अपराजित टिम मात्र बाँकी रहेका छन् । त्यसमा मछिन्द्रसँगै संकटा र आर्मी रहेका छन् । अहिलेसम्म जित विहीन एक मात्र टिम फ्रेन्ड्स रहेको छ र यो १४ टिममध्ये अंक तालिकाको पुछारमा छ । 

हिमालयन शेर्पा र जावलाखेल भने लगातार दोस्रो जित निकाल्न सफल रह्यो । यस्तै थ्री स्टारले लगातार चौथो बराबरी खेल्यो, यसमध्ये पछिल्ला तीन बराबरी गोलरहित छन् ।