काठमाडौं, पुस १३। बलिउडकी चर्चित गायिका असिस कौर नेपाल आउनुहुने भएको छ । यही जनवरी ८ मा दरबारमार्गमा रहेको क्लब प्लाटिनममा आयोजना हुने ‘राता लम्बिया नाइट विथ असिस कौर’ कन्सर्टका लागि उहाँ नेपाल आउनुहुने भएको हो ।

फेलिज इन्टरनेशनल इभेन्टले कन्सर्टको आयोजना गर्न लागेको हो। नेपाली दर्शकको बलिउड सेलिब्रेटी भेट्ने र सँगै नाच्ने चाहना पुरा गर्न कार्यक्रम आयोजना गर्न लागेको आयोजक संस्थाका सिइओ शाहिल खानले बताउनुभयो । ‘विश्वमा नेपाल कोरोनाको कहरबाट मुक्त हुँदै गएको सन्देश समेत कार्यक्रमले दिनेछ’ खानले भन्नुभयो ‘कौरको ‘राता लम्बिया’ गीत अहिले ब्यापक हिट भएको र बजारको माहोल हेरेर उहाँलाई ल्याउन लागेको हो ।’ नेपालमा बलिउड सेलिब्रेटीको प्रस्तुति नभएको धेरै समय भएको समेत उहाँले बताउनुभयो ।

कार्यक्रममा आसीस कौरका अलवा नेपाली गायक याबेश थापाको समेत धमाकेदार प्रस्तुति रहनेछ । असिस कौरको पछिल्लो समय ‘राता लम्बिया’ गीत निकै हिट रहेको छ । कौरले इन्डियन आइडल, आवाज पंजाब दी लगायतका विभिन्न गायन रियालिटी शोमा भाग लिनुभएको थियो । सन् २०२० मा खुदा हाफिज फिल्मको ‘जान बन गए’ बोलको गीतले उहाँलाई चर्चा दिलाएको थियो ।

पाँच वर्षको हुँदादेखि नै गायन क्षेत्रमा लाग्नुभएको कौरले ‘तमाचे’ फिल्मको ‘दिलदारा रिप्राइज’ मार्फत् बलिउडमा डेब्यू गर्नुभएको  थियोे । त्यसयता उहाँले बलिउडका थुप्रै फिल्मको गीतमा आफ्नो आवाज दिइसक्नुभएको छ ।

केसरी फिल्मको ‘भे माही’, ड्राइभ फिल्मको ‘मखना’, सिम्बा फिल्मका दुई गीत ‘बन्देया रे बन्देया’ र ‘तेरे बिन’, लभयात्री फिल्मको ‘आख लड जावे’, ‘छोगडा’ र कपुर्स एण्ड सन्स फिल्मको ‘बोल्ना’ गीतमा उहाँले आफ्नो स्वरको जादु पस्किसक्नुभएको छ ।  २०२१ को फिल्म फेयर अवार्ड कार्यक्रममा समेत उहाँले आफ्ना हिट नम्बरबाट दर्शक नचाउनुहुनेछ । कार्यक्रमका लागि कौर ७ जनवरीमा नेपाल आउनुहुनेछ । कन्सर्टको टिकट इसेवाबाट पनि प्राप्त गर्न सकिनेछ ।