काठमाडौं, पुस २१ । अस्ट्रेलियामा बनेको चलचित्र ‘पर्पला’ को फस्र्ट लुक पोस्टर सार्वजनिक गरिएको छ । कोभिड १९ को महामारीले विश्व ग्रस्त भएको भयता पनि नेपाली सिनेमा निर्माणलाई पनि निरन्तरता दिनु पर्छ भन्ने उदेश्य राखेर नेपालीहरुको बाक्लो बसोबास रहेको अष्ट्रेलिया त्यसमा पनि सिड्नीमा नेपाली थ्रिलर हरर सिनेमा ‘पर्पला’ को निर्माण गरिएको छ । अष्ट्रेलियामा बस्ने नेपालीहरुकै जीवनमा घटेका बिभिन्न घटनाक्रमहरुबाट प्रभावित भएर यस सिनेमाको लेखन तथा निर्माण गरेको कुरा लेखक तथा निर्देशक मनोज अधिकारीले जानकारी दिनुभएको छ ।  

हलिउड प्राविधिक र नेपाली फिल्मकर्मीको सहकार्यमा निर्मित नेपाली फिल्मको सम्पूर्ण छायाँकन अष्ट्रेलियामा रहेको र दोस्रो चरणको छायाँकन छिट्टै गरेर सिनेमालाई बजारमा ल्याउने निर्माण पक्षले बताएको छ । निर्माता तथा कलाकार भानु प्रतापले अष्ट्रेलिया बसाइको क्रममा त्यहाँको टिमसंग मिलेर चलचित्र ‘पर्पला’ को निर्माण गर्नुभएको हो । उहाँले निर्माण गरेको पछील्लो चलचित्र ‘लाल्टिन’ पछी अस्ट्रेलियामा बसोबास गर्दे आउनुभएको उहाँले यो बिचमा म्युजिक भिडियो, शर्ट मुभी निर्माण साथै नेपाली चलचित्रहरुको अस्ट्रेलियामा प्रदर्शन गर्दे आउनुभएको छ ।  

अष्ट्रेलिया बसेर नेपाली फिल्मको निर्माण र प्रबर्धनमा एक दशकदेखि निरन्तर लागि परेका मनोज अधिकारी ‘पर्पला’ फिल्मका लेखक तथा निर्देशक हुनुहुन्छ। उहाँले अष्ट्रेलियामा बनेको पहिलो नेपाली चलचित्र ‘ऋतु’ को निर्माण तथा निर्देशन गर्नुभएको थियो । यस लगायत अष्ट्रेलिया र नेपालमा बनेका थुप्रै फिल्ममा निर्माता रुपमा पनि अनुभब बटुल्नुभएको उहाँले अष्ट्रेलियन (हलिउड) सिनेमा ‘गर्ल एडिक्टेड’ भन्ने अङ्रेजी सिनेमाको पनि निर्देशन गरी सक्नुभएको छ। ‘पर्पला’ सिनेमाको कथा लेख्नको लागि नर्सिङ पेशामा रहेकी आफ्नी श्रीमती र अरु साथीभाईहरुले सुनाएका घटनाहरुले प्रेरणा दिएको उहाँ बताउनुहुन्छ ।

पर्पला फिल्मका मुख्य अभिनेता पुकार गौतम रहेका रहनुभएको छ । उहाँ नेपालमा झरना थापासँग ‘झिल्के’ नामक सिनेमा खेल्नुभएको थियो भने अष्ट्रेलिया गएपछी ‘ह्याप्पी न्यु इयर’ मा नायक भएर अभिनय गरी सक्नुभएको छ । पुकारले ‘पर्पला’ लाई सिनेमा क्षेत्रमा अगाडि बढाउदै स्थापित गराउन मद्दत गर्ने सिनेमाको रुपमा लिनुभएको छ ।

बिगत पाँच बर्ष देखि अस्ट्रेलियामा बसोबास गर्दे आउनुभएकी निखिला बुढाथोकी पेशाले नर्स हुनुहुन्छ । उहाँ अस्ट्रेलियामा राम्रो बेली डान्सरको रुपमा परिचित हुनुहुन्छ । उहाँले थुप्रै इभेन्टमा आफ्नो प्रतिभा देखाउनुका साथै आधा दर्जन म्युजिक भिडियोमा समेत काम गरि सक्नुुभएको छ । अभिनय समेत एकदम अब्बल निखिला ‘पर्पला’ फिल्मकी मुख्य नायिका हुनुुहुन्छ ।

बिगत १२ बर्ष देखि अस्ट्रेलियामा महिला ब्यबसायिको रुपमा स्थापित रोजी पन्तले पनि यसै चलचित्र मार्फत सह नायिकाको रुपमा डेब्यु गर्दै हुनुहुन्छ, यसअघि उहाँले बिभिन्न म्युजिक भिडियोमा अभिनय गरेर आफ्नो कला देखाई सक्नुभएको छ । त्यसैगरी नेपालमा रहँदा केहि टेली सिरियल र नेपाली सिनेमामा अभिनय गरेकी प्रेक्ष्या अधिकारीले पनि ‘पर्पला’ फिल्ममा सह नायिकाको रुपमा अभिनय गरिसक्नुुभएको छ ।

अष्ट्रेलियन कलाकार ओल्गा तमरा अष्ट्रेलियन फिल्म क्षेत्रमा चिनिएको नाम हो, पर्पला फिल्मको कथा र स्क्रिप्ट मन पराएर यस नेपाली सिनेमा खेल्न राजी हुनुभएको हो । उहाँको फिल्ममा बिशेष भूमिका रहेको छ । यी लगायत एक दर्जन भन्दा बढी अष्ट्रेलियन कलाकारले पनि यस सिनेमामा अभिनय गर्नुभएको छ ।

आरकेएस अस्ट्रेलिया, ओएमजी इन्टरटेन्मेन्ट र ग्रीन हिल्स इन्टरटेन्मेन्टको ब्यानरमा निर्माण भएको चलचित्रका प्रस्तुतकर्ता भानु प्रताप ढकाल हुनुहुन्छ। अस्ट्रेलियन छायाँकार कास्मिर डिक्सनले छायाँकन गरेको चलचित्रको सम्पादन सुरेन्द्र पौडेलले गर्नुभएको हो । रबिन्द्र कुमार शर्मा डम्बर बहादुर रसाइली, छबी अधिकारी सरोज कुमार वाइबा निर्माता रहनुभएको छ। सरस्वती गौतम, सिर्जना ल्वागुन, भिम राज रसाइली, वचन कुमार मल्ल चलचित्रको सह निर्माता रहनुभएको छ ।