काठमाडौं, माघ ३। चर्चित रियालिटी सो 'द भ्वाइस किड्स'का कोच गायक राजु लामा एक गायक, गीतकार, संगीतकार तथा अभिनेत्री मात्र नभई एक असल र निस्वार्थी समाज सेवक पनि हुनुहुन्छ। यो कुरा उहाँले यसै वर्ष सिन्धुपाल्चोकका बाढीपीडितलाई गर्नुभएको निस्वार्थ सेवा भावले प्रमाणित गरिसकेको छ। राहत बाँड्नेदेखि लिएर राजु लामाले त्यहाँका पीडितलाई सिन्धुपाल्चोकमै गएर विभिन्न सहयोग गर्नुभएको थियो ।

समाज सेवाकै क्रममा उहाँ विभिन्न ठाउँहरू घुमिरहनुहुन्छ। राजु लामालाई हामीले काठमाडौंमा भने कम नै देख्न सक्छौँ। उहाँ बेला बेलामा हिमशृङखलाहरू पनि चढ्न रुचाउनुहुन्छ। गएको शनिबार ‘द भ्वाइस किड्स’को फाइनलमा कोच राजुले एउटा ठुलो रहस्य खुलाउनु भयो। गायक राजु लामाले सगरमाथा चढ्ने घोषणा गर्नुभएको छ। उहाँले आफ्नो परिवारलाई पनि नभन्नु भएको कुरा उक्त शो मार्फत घोषणा गर्नुभएको हो ।

उहाँले भन्नुभएको छ, 'म सगरमाथा चढ्ने चेष्टा गर्दैछु, जलवायु परिवर्तनको कारण हिमालमा हिमनदीहरू पग्लिएर प्राकृतिक प्रकोपहरू निम्त्याइरहेको छ। यसको बारेमा सन्देश लिएर जाँदैछु, यसको लागि मलाई मेरो सिंगो देशका दिदीबहिनी, दाजुभाइको आशीर्वाद, माया र साथको आवश्यक छ, मलाई आशीर्वाद दिनु होला कि म संसारकै अग्लो चुचुरोमा पुगेर सन्देश दिन सकुँ ।' साथै उहाँले सम्पूर्ण कलाकार र संगीतकार मात्र नभई सिंगो देशलाई नै प्रतिनिधित्व गरेर जान लागेको कुरा पनि जानकारी दिनुभयो ।
राजु लामालाई सम्पूर्ण नेपालीहरूको तर्फबाट सफलताको शुभकामना ।