काठमाडौं, माघ ५ । वैदेशिक रोजगारीमा गएका युवाहरूले पठाएको रेमिट्यान्सले पछिल्लो समय शहरी क्षेत्रमा जग्गाको कारोबार ह्वात्तै बढाएको छ । यो वर्षको ६ महिनामा पनि शहरी क्षेत्रका भागमा रहेका टुक्रे जग्गामा ग्राहकको आकर्षण बढेको छ ।

शहरी क्षेत्रका महँगा जग्गाको कारोबार बढ्दा त्यसले सरकारको राजस्व भने ह्वात्तै बढाएको छ । भूमि व्यवस्था तथा अभिलेख विभागका अनुसार साउन यता देखि पुष सम्मको ६ महिनामा कुल कारोबारमा २१ प्रतिशतले वृद्धि भएको छ ।

गत वर्षको पुष मसान्तसम्ममा ८ लाख ८ हजार वटा जग्गाको किनबेच भएकोमा यो वर्षको सोही अवधिमा यस्तो कारोबार १० लाख पुगेको छ । विभागका प्रवक्ता कृष्ण प्रसाद भण्डारी भन्छन् ‘ शहरी क्षेत्रका जग्गाको कारोबार ह्वात्तै बढेकाले कारोबारको संख्या २१ मात्रै वृद्धि हुँदापनि कुल राजस्वमा भने ४४ प्रतिशतको बृद्धि अर्थात गत वर्षको तुलनामा १९ अर्ब १८ करोड बढि राजस्व प्राप्त भएको छ ।

विभागका अनुसार गत वर्षको पुष मसान्तमा २ लाख १४ हजार वटा जग्गा किनबेच भएकोमा यो वर्षको पुष महिनामा १ लाख ५७ हजार जग्गा किनबेच भएका छन् । अर्थात  गत वर्षको तुलनामा यो वर्षको सोहि अवधिमा यस्तो कारोबारमा ३६ दशमलव चार आठ प्रतिशतले कमी आएको छ । गत मंसिर महिनामा भने यस्तो कारोबार अघिल्लो वर्षको तुलनामा १ प्रतिशतले मात्रै बढेको थियो । जबकी गत भाद्र महिनामा यस्तो कारोबार गत वर्षको  तुलनामा ७२ प्रतिशतले बढेको थियो ।

मंसिर र पुष महिनाको तथ्यांक केलाउँदा घरजग्गा कारोबारमा बिस्तारै सुस्तता आएको देखिएपनि यो वर्षको छ महिनाको पूर्ण तथ्यांक केलाउँदा चाँहि गत वर्षको तुलनामा कारोबारमा वृद्धि भएको देखिन्छ ।