काठमाडौं, माघ २१ । नेपालको पहिलो बैंक नेपाल बैंक लिमिटेडले आफ्नो ब्रान्ड एम्बास्डरमा डा. महावीर पुनलाई पुनःनियुक्त गरेको छ । गतवर्ष नेपाल बैंकको ब्रान्ड एम्बास्डरमा नियुक्त भएका राष्ट्रिय आविष्कार केन्द्रका अध्यक्ष डा. महावीर पुनसँगको एक वर्षको सम्झौता अवधि सकिएपछि पुनः १ वर्ष अवधि थप गरिएको छ ।
यही माघ २० गते नेपाल बैंक लिमिटेड प्रधान कार्यालय, काठमाडौंमा आयोजित एक समारोहमा बैंकका प्रमुख कार्यकारी अधिकृत श्री कृष्ण बहादुर अधिकारी र डा. महावीर पुनका बिच उक्त ब्रान्ड एम्बास्डर नवीकरण सम्बन्धी सम्झौतामा हस्ताक्षर भएको हो । उक्त कार्यक्रममा एम्बास्डरमा नियुक्त डा. महावीर पुनले नेपाल बैंक जस्तो नेपालको बैंकिङ्ग क्षेत्रको गौरवमय इतिहास बोकेको संस्थामा ब्रान्ड एम्बास्डरको रुपमा पुनःनियुक्त हुन पाएकोमा खुसी व्यक्त गर्नुभयो । उहाँले नेपाल बैंकले देखाएको सम्मान र सहयोगप्रति आभार व्यक्त गर्दै नेपाल बैंकको श्री वृद्धिमा आफ्नो सक्दो योगदान रहने बताउनुभयो ।
त्यसैगरी प्रमुख कार्यकारी अधिकृत श्री कृष्ण बहादुर अधिकारीले डा. महावीर पुन जस्तो विशिष्ट व्यक्तित्व साथै आम नेपालीको प्रेरणाको श्रोतलाई नेपाल बैंकको ब्रान्ड एम्बासडर को रुपमा निरन्तरता दिन पाउनु आफैमा गर्वको विषय भएको बताउनुभयो साथै डा. पुनले नेपाल बैंक छनौट गर्नुभएकोमा उहाँप्रति हार्दिक आभार समेत व्यक्त गर्नुभयो ।
नेपालभरी २१३ शाखाहरु, १४८ वटा एटिएम र ४९ वटा एक्सटेन्सन काउन्टर लगायत करिब २५०० कर्मचारीहरूबाट बैंकिङ सेवा प्रदान गरिरहेको नेपाल बैंक आज नेपालको स्वस्थ र सबल बैंकको रुपमा अगाडि बढिरहेको छ । पछिल्लो समय आधुनिक प्रविधि अवलम्बन र ग्राहक सेवामा व्यापक सुधार गर्दे तिब्ररुपमा व्यवसाय बिस्तार गर्न सफल यस बैंक प्रतिको विश्वासको कारण नेपाल बैंक ग्राहकहरूको प्रमुख रोजाइको बैंक बन्न पुगेको छ ।
