काठमाडौं, माघ २९। चारदेशीय टी-ट्वान्टी क्रिकेट सिरिजअन्तर्गतको दोस्रो खेलमा नेपाल संयुक्त अरब इमिरेट् ९युएइ० सँग पराजित भएको छ ।

ओमानको अल अमेरात क्रिकेट मैदानमा आज भएको खेलमा नेपाल युएईसँग २५ रनले पराजित भएको हो । एक सय ९३ रनको विशाल लक्ष्य पछ्याएको नेपाल निर्धारित २० ओभरमा पाँच विकेट गुमाउँदै १६७ रनमा समेटियो । नेपालका लागि दीपेन्द्र सिंह ऐरीले सर्वाधिक ४१ रनको योगदान दिनुभयो । ३३ बल खेल्नुभएका उहाँले पाँच चौकाको मद्दतमा ४१ रन जोड्नुभएको हो ।

त्यस्तै लोकेश बमले २१ बलमा ३३ रन जोड्नुभयो। उहाँले दुई चौका र दुई छक्का प्रहार गर्नुभयो । आसिफ शेखले २९ बलमा ३४ रन बनाउनुभयो । उहाँले चार चौका र एक छक्का प्रहार गरे । ज्ञानेन्द्र मल्लले १९ बलमा २२ रन बनाउदा दुई चौका र एक छक्का हिर्काउनुभयो । आरिफ शेखले ११ रन र शरद भेषावकले १० रन जोड्नुभयो।

युएईका रोहन मुस्तफा र कासिफ दाउदले समान दुई–दुई विकेट लिए भने जुनैद सिद्धिकीले एक विकेट हात पार्नुभयो। त्यसअघि टस हारेर पहिले ब्याटिङ गरेको युएइले निर्धारित २० ओभरमा तीन विकेट गुमाउँदै १९२ रन जोड्यो । युएईका लागि चिराग सुरीले अविजित सर्वाधिक ८४ रनको योगदान गर्नुभयो । उहाँले पाँच चौका र पाँच छक्का प्रहार गरे । रोहन मुस्ताफाले ३५ बलमा ४९ रन बनाउनुभयो भने उहाँले पाँच चौका र दुई छक्का हिर्काउनुभयो ।

त्यस्तै मोहमद वासिमले १३ बलमा २२ रन ड्नुभयो । उहाँले एक चौका र दुई छक्का प्रहार गर्नुभयो । मोहमद बुटाले १४ रन बनाउनुभयो । नेपालका लागि कप्तान सन्दीप लामिछाने, आरिफ शेख र साहाव आलमले एक–एक विकेट लिनुभयो । नेपालले हिजो भएको पहिलो खेलमा ओमानलाई ६ विकेटले पराजित गरेको थियो । नेपालले चार देश सम्मिलित टी ट्वान्टी सिरिजमा अन्तिम खेल फागुन २ गते आयरल्यान्डसँग खेल्नेछ ।