स्पेन, वैशाख ३० । एट्लिको मड्रिड स्पेनिस लिग ला लिगाको उपाधी तर्फ एक कदम अघि बढेको छ । गएराती भएको खेलमा एट्लेटिकोले रियाल सोसिडाडलाइ दुइ एक गोलले पराजित गरेको हो । 

घरेलु मैदानमा प्राप्त यो जीतपछि एट्लेटिकोले तालिकामा स्पष्ट चार अंकको अग्रता लिएको छ । १६ औं मिनेटमा यानिक करास्कोले एट्लेटिकोका लागि गोलको खाता खोल्नु भएको थियो । करास्कोले ला लिगाका पछिल्ला चार खेलमा चार गोल गर्दै चार एसिस्ट गर्नुभएको छ । २८ औं मिनेटमा एंजल करियाले टिमका लागि दोस्रो गोल थप्नुभयो । उहाँले लुइस स्वारेजको उत्कृष्ट थ्रो बलको सदुपयोग गर्दै गोल गर्नुभएको हो ।

खेलको अन्त्य तिर सोसिडाडले गोल गर्दै एट्लेटिको माथि दवाव बनाएको थियो । उसका लागि ८३ औं मिनेटमा इगोर सुबेल्डियाले गोल गर्नुभएको थियो । तर  डिएगो सिमोयानीको टोलीले आफ्नो अग्रता कायमै राख्दै तीन अंक जोड्न सफल भयो । अब लिगका बाँंकी दुवै खेलमा जित हात पारे एट्लेटिको एघारौ पटक लिग च्याम्पियन बन्नेछ । उसले पछिल्लो पटक सन् २०१४ मा लिग जितेको थियो । एट्लेटिकोले आगामी आइतबार ओसासुना र १६ मे मा रियाल भल्लाडोलिडसंग खेल्नेछ । शीर्ष स्थानमा रहेको एट्लेटिकोको ३६ खेलबाट ८० अंक छ । दोस्रो स्थानमा रहेको बार्सीलोनाको ७६ अंक छ ।  एक खेल कम खेल्दै तेस्रो स्थानमा रहेको रियाल मड्रिडको ७५ अंक छ । सोसिडाड पाँचौं स्थानमा छ ।