बेलायत, वैशाख ३० । इङलिस प्रिमियर लिगमा आर्सनलले, चेल्सी माथि एक शुन्य गोलको जीत हात पारेको छ ।  शीर्ष चारका लागि प्रतिस्पर्धा गरिरहेको चेल्सी, म्यानचेस्टर सिटीलाइ पराजित गरेपछि उच्च मनोवलका साथ मैदानमा उत्रिएको थियो । तर आर्सनलले चेल्सीलाइ उसकै मैदानमा पराजित गर्यो । १६ औं मिनेटमा पियरे इम्रिके अबोमयाङको पासमा एमिल स्मिथ रोले गोल गरेपछि आर्सनलले अग्रता लिएको थियो । सोही गोल उसको जीतमा निर्णायक बन्यो । बल पोसेसनमा पक्कड जमाएपनि चेल्सीले बराबरी गोल फर्काउन सकेन । उसको दुइ प्रहार क्रस बारमा लागेर फर्किएको थियो । क्रिस्यिटन पुलिसिचले गोल गर्दै चेल्सीलाइ खेलमा फर्काएको सोचेका थिए । तर उहाँको गोललाइ भिडियो एसिस्टेन्ट रेफ्रिले अफसाइड दियो ।

आर्सनलले १७ वर्षपछि पहिलो पटक सिजनको दुवै भेटमा चेल्सी माथि जीत हात पारेको हो । हारका बाबजुत चेल्सी ३६ खेलबाट ६४ अंक जोड्दै तालिकाको चौथो स्थानमा यथावत छ । आर्सनल ५५ अंकका साथ आठौं स्थानमा छ । प्रिमियर लिगको उपाधी भने म्यानचेस्टर सिटीले जितिसकेको छ ।