काठमाडौं, फागुन १२। हरेक चोटि विवादित गित बनाएर संगीतिक क्षेत्रमा विवादित छवि बनाउनुभएका दुर्गेश थापा अर्को विवादमा तानिनुभएको छ । बलात्कारको आरोप खेपिरहनु भएका नायक पल शाहले आफूविरुद्ध षडयन्त्र भएको भन्दै सोसल मिडिया मार्फत गायक दुर्गेश थापाको नाम लिनुभएको छ। गायक दुर्गेश थापा अभिनेता पल शाहका नजिकका मित्र समेत रहनुभएको छ ।

थापाले पल शाहमाथि शोषण गरेको आरोप लगाउनुभएको छ। नाबालिगको शोषण गरेर पल शाहले गल्ती गर्नुभएको र हामीले न्यायको लागि सहयोग गर्दा शाहले हामीलाई दोष लगाउनुको कारण थाहा नभएको उहाँले बताउनुभएको छ । थापाले भन्नुभएको छ, "हामी यो नाबालिगलाई कुनै पनि मूल्यमा न्याय पाउनु पर्छ भन्ने स्पष्ट गर्न चाहन्छौं। यसबारेमा पत्रकार सम्मेलन गरेर विस्तृत जानकारी दिनेछौँ ।”

पीडितले अभिनेता पल शाहविरुद्ध बलात्कारको आरोपमा जिल्ला प्रहरी कार्यालय तनहुँमा उजुरी दिएको प्रहरी स्रोतले बिहीबार जनाएको छ । उजुरी परेपछि प्रहरीले अनुसन्धान थालेको छ । तर शाहले आफूबिरुद्ध षड्यन्त्र भएको भन्दै आफूमाथि षडयन्त्र गर्ने व्यक्तिहरुको नाम र प्रमाण सहित केहि अडियो क्लिपसमेत सार्वजनिक गरिसक्नुभएको छ ।

उहाँले गायक दुर्गेश थापा सहित ३ जनाको नाम सार्वजनिक गर्नुभएको छ । शाहले दोषी भए नेपालको कानुन बमोजिम सजाय भोग्न तयार रहेको पनि बताउनुभएको छ ।