काठमाडौं, फागुन १४। फिल्म ‘लाखे’ युनिट मुस्ताङ पुगेको छ । फिल्मको क्लाइमेक्स छायांकनका लागि निर्माण युनिट केही दिन अगाडि मुस्ताङ पुगेको हो ।

मुस्ताङको कागबेनीलगायत बिभिन्न मनोरम दृश्य समेटिने गरेर फिल्मको क्लाइमेक्स छायांकन भइरहेको कार्यकारी निर्माता हरि मल्ल ठकुरीले बताउनुभयो । ‘‘लाखे’ को क्लाइमेक्स कसैले नसोचेको बिषेश छ’ निर्माता ठकुरीले भन्नुभयो ‘त्यसैले पनि हामीले मुस्ताङ रोजेका हौ ।’

सौगात मल्ल, अनुप विक्रम शाही, आर्यन अधिकारी, सुशील सिटौला, रोहित रुम्बा लगायत कलाकार क्लाइमेक्सका लागि मुस्ताङ पुगिसक्नुभएको छ भने अभिनेत्री बर्षा राउत, अर्पण थापा, प्रशान्त ताम्रकार लगायत भने केही दिनमा पुग्नुहुनेछ । 

सम्राट बस्नेतको निर्देशक रहेको ‘लाखे’ मल्टिस्टार कलाकारले भरिएको फिल्म हो । फिल्ममा सौगात मल्ल, अनुप विक्रम शाही, आर्यन अधिकारी, सुशील सिटौला, रोहित रुम्बा, बर्षा राउत, अर्पण थापा, प्रशान्त ताम्रकार, संजोक राणा र कालु राना लगायत कलाकारको मुख्य भुमिका रहेको छ । फिल्म काठमाडौँको छायांकन पछि मुस्ताङ पुगेको हो । मुस्ताङको क्लाइमेक्स सकाएर फिल्म फेरि काठमाडौँमा केही दिन छायांकन हुने निर्माण युनिटले जानकारी दिएको छ । 

ग्लोबल मिडिया एण्ड रिसर्च सेन्टर तथा औरियन प्रोडक्सनको ब्यानरमा निर्माण भइरहेको फिल्मका निर्माता सिजन अर्याल हुनुहुन्छ । कथा समेत निर्माता अर्यालकै रहेको फिल्मको गणेश मल्ल ठकुरी (जिएम) प्रस्तुतकर्ता र हरि मल्ल ठकुरी कार्यकारी निर्माता रहनुभएको छ ।