जापान, फागुन १८। युक्रेनी सरकारले रूससँग लड्न विदेशी स्वयम् सेवक सेनाका रुपमा भर्ती भई युक्रेनलाई सहयोग गर्न आह्वान गरे पश्चात विश्वका विभिन्न मुलुकका इच्छुक मानिसहरुले धमाधम आवेदन दिइरहेका छन् ।
यसै क्रममा मार्च १ तारिखसम्ममा ७० जना जापानीहरूले युक्रेनका लागि स्वयंसेवक सेनाका रुपमा भर्ना हुन इच्छुक भई आवेदन दिएको जापानी संचार माध्यमहरूले जनाएका छन् । लगभग ७० जापानीहरू स्वयंसेवा गरिरहेका छन्। जापानस्थित युक्रेनी दूतावासका एक अधिकारीले खुलासा गरेको भनिएको जानकारी अनुसार यसरी आवेदन दिनेहरू सबै पुरुष हुन्, र त्यस मध्ये धेरै जसो सेल्फ डिफेन्स फोर्सका पूर्व कर्मचारीहरू हुन् ।
युक्रेनी राष्ट्रपति जेलेन्स्कीले फेब्रुअरी २७ मा स्वयंसेवक विदेशी सेना गठन गर्ने घोषणा गर्नुभएको थियो । सोही दिन जापानमा युक्रेनको दूतावासले ट्विटर मार्फत “एकसाथ लड्न चाहने मानिसहरूलाई आवेदनका लागि आह्वान गरेको थियो । दूतावास मार्फत भर्नाको जिम्मा पाएको टोकियोस्थित एक कम्पनीका अधिकारीका अनुसार १ गते रातिसम्म जापानबाट ७० जनाले आवेदन दिन प्रस्ताव गरेका छन्। जसमध्ये जापानको सेल्फ डिफेन्स फोर्सका पूर्व कर्मचारी रहेका छन् । आवेदनका लागि प्रस्ताव गर्ने २ जना युवा भने फ्रान्सेली सेनाका पूर्व कर्मचारी भएको पनि बताईएको छ ।
