काठमाडौं, फागुन २३। गायिका प्रीति कौरले नयाँ गीत ‘के को शान’ बजारमा ल्याउनुभएको छ। आइतबार एक कार्यक्रमबीच गायिका कौरले ‘के को शान’ गीतसँगै म्युजिक भिडियो सार्वजनिक गर्नुभएको हो ।

‘के को शान’मा शब्द र कम्पोजिसन गायिका प्रीति कौर आफैँले गर्नुभएको छ । गीतको मिक्सिङ विशेष पाण्डेले गर्नुभएको हो भने निर्मातामा पवन टाक्की कार्की रहनुभएको छ । अभिषेक सुवेदीले निर्देशन गर्नुभएको भिडियोमा गायिका कौर र शिरिर शिवाकोटीले अभिनय गर्नुभएको छ। मिडिया पोर्टले निर्माण गरेको भिडियो चेतनराज भण्डारीले खिच्नुभएको हो भने अर्जुन कार्कीले सम्पादन गर्नुभएको हो ।

कार्यक्रममा गायिका कौरले ‘के को शान’ सहित केही गीत प्रस्तुत गर्नुभयो । सो क्रममा उहाँले लामो समयपछि स्टेजमा उक्लन पाउँदा खुसी लागेको बताउनुभयो । ‘करिब ६-७ वर्षपछि स्टेजमा ब्याक भएको छु, खुसीसँगै उत्साहित पनि छु । साथै यहाँहरूको साथ र सहयोगको अपेक्षा पनि राखेका छु,’ गायिका कौरले भन्नुभयो ।