काठमाडौं, फागुन ३०। मिठो पिरो चाउचाउका रुपमा नेपाली बजारमा सर्वाधिक रुचाइएको करेन्ट चाउचाउको उत्पादक यशोदा फुड्सले फरक स्वादको नयाँ चाउचाउ र चिज बल्स पस्कने भएको छ ।
काठमाडौंमा एक कार्यक्रमको आयोजना गर्दै यशोदा फुड्सले सो कुराको जानकारी दिएको हो । कार्यक्रम मार्फत उद्योगले सुपर प्रिमियम चाउचाउ अन्तर्गत करेन्ट चिज एण्ड बटर, करेन्ट मसरुम नुडल्स, करेन्ट इन्स्ट्यान्ट नुडल्स (फेमिली प्याक) र करेन्ट चिज चिकेन पिज्जा नाम र स्वादको चाउचाउ सार्वजनिक गरेको हो । सुपर प्रिमियम चाउचाउ अन्तर्गत नेपालमै पहिलो पटक करेन्ट चिज एण्ड बटर, करेन्ट मसरुम नुडल्स फेमिली प्याकमा उपलब्ध छ भने यसको प्रति पिसको मूल्य रु. १२० र तौल १२० ग्राम रहेको समेत उद्योगले जनाएको छ । साथै फेमिली प्याकमा रु. २० पर्ने करेन्ट इन्स्ट्यान्ट नुडल्स र पिज्जाको स्वादमा करेन्ट चिज चिकेन पिज्जा समेत सोही कार्यक्रमका बिच सार्वजनिक भएको छ । सोही कार्यक्रमकै माध्यमबाट चिज बल्स पारखीका लागि चिज बल्स अन्तर्गत चिजको स्वादमा रु. ५० पर्ने चिज बल्स समेत सार्वजनिक गरेको छ ।
विदेशबाट हुने चाउचाउ आयातलाई विस्थापित गरी स्वदेशी उत्पादनलाई बढावा दिँदै करेन्ट अहिले नेपालकै नं १ ब्रान्ड बनिसकेको छ । उपभोक्ताको पहिलो रोजाईमा यशोदा फुड्सका उत्पादन रहेको र सोही अनुसार नवीनतम स्वादका ब्रान्डहरू पस्किने अवसर प्रदान गरेकोमा समस्त उपभोक्तालाई धन्यबाद ज्ञापन गरिएको थियो । नेपालमा मात्र नभइ भारत, युरोप, कोरिया, जापान, अमेरिका, क्यानाडा, बेलायतै, अष्ट्रेलिया लगायत देशमा समेत आफ्ना उत्पादन निर्यात गरी देशको अर्थतन्त्रमा उल्लेखनीय योगदान पुर्याइरहेको उद्योगबाट जारी विज्ञप्तिमा जनाइएको छ ।
साना तथा मझौला उद्योगदेखि आफ्नो व्यवसायीक यात्रा शुरु गरेको यशोदा ग्रुपको यात्रा मसला, चियापत्ती, चाउचाउ, हाउजिङ, होटल, फिल्म, सेवा सम्म पुग्दै नेपालकै उच्च व्यवसायीक समुहको रुपमा आफूलाई स्थापित गर्न सफल भएको, ३५०० भन्दा बढी जनशक्तिका लागि प्रत्यक्ष अप्रत्यक्ष रोजगारीका अवसर प्रदान गरेको उद्योगले जनाएको छ। आफ्ना उत्पादनहरूमा उपभोक्ताको सहज पहुँचका लागि कम्पनीले १५० भन्दा बढी डिलरहरूको सञ्जाल विस्तार गरेको, कृषकहरूको आर्थिक आय आर्जनमा मद्दत पुर्याउने उद्देश्य लिएर उद्योगले स्वदेशमै कृषि कार्य गरी रहेका स्थानीय कृषकहरुबाट उत्पादित अकबरे खुर्सानी, गुन्द्रुक, तामा, टिमुर, अदुवा, बेसार लगाएतका कृषिजन्य उत्पादनहरू उद्योगका कच्चा पदार्थको रुपमा प्रयोग गरी किसान दाजुभाई दिदीवहीनीहरुलाई समेत हौसला प्रदान गर्ने गरेको र कोरोना महामारी जस्तो प्रतिकुल समयका पनि उद्योगसँग आवद्ध कोही पनि कामदारहरु बेरोजगार हुनु नपरेको समेत उद्योगले जनाएको छ ।
