काठमाडौं, चैत १२। प्रेमकथानक फिल्म ‘सम्झना–बिर्सना’ को प्रदर्शन मिति पक्का गरिएको छ । निमेष प्रधानको निर्देशनमा बनेको फिल्म ०७९ को जेठ ६ गते दर्शक माझ आउनेछ ।

आदित्य प्रधान र रेविका प्रधान निर्माता रहेको फिल्ममा पूजा शर्मा र आकाश श्रेष्ठको जोडीका साथमा सुनील थापा, शिसिर राणा र छुल्ठिम गुरुङ प्रमुख भूमिकामा रहनुभएको छ । कोरोना महामारीका कारण प्रदर्शन हुन नपाएको फिल्म अब भने दर्शक माझ आउने तयारीमा जुटेको हो । निर्माण युनिटले शुक्रबार फिल्मको नयाँ पोस्टरका साथमा प्रदर्शन मिति घोषणा गरेको हो । नयाँ पोस्टरमा पूजा र आकाशलाई रोमान्टिक मुडमा प्रस्तुत गरिएको छ ।

दार्जिलिङ,सिल्गुढी तथा सिक्कीमका रमणीय स्थानमा खिचिएको फिल्मलाई आरआर फिल्मस्ले बितरण गर्दैछ । निर्देशक निमेषकै कथा, पटकथा रहेको फिल्मको सम्वाद लेखनमा उहाँलाई अभिनेता शिशिर राणाले सघाउनुभएको छ । शिब ढकालले खिच्नुभएको फिल्मका गीतमा राजन इशान र सुदर्शन तामाङको संगीत अनि कमल राईको कोरियोग्राफी छ । आदित्य फिल्म्स्को प्रस्तुति रहेको फिल्मको क्रिएटिभ हेड स्व.बिशारद बस्नेत हुनुहुन्छ ।

आफूहरुले गुणस्तरिय फिल्म निर्माणमा कुनै कसर बाँकी नराखेको निर्माता आदित्य बताउनुहुन्छ । प्रेमी जोडीहरु बीच हुने बिबिध आरोह अबरोहलाई प्रस्तुत गरिएको बताउनुभयो । यो फिल्म सुटिङका क्रममा पूजा र आकाश बीच प्रेम झांङ्गीएको चर्चा चलेको थियो । यद्यपी, उनीहरुबीच अहिले उनीहरुबिचको सम्बन्ध सुमधुर नरहेको बताइन्छ ।

‘सम्झना बिर्सना’ ले पूजा-आकाशलाई एकपटक फेरि संगै पर्दामा हेर्ने दर्शकको चाहना भने पूरा गर्ने भएको छ । कतिपयले ‘सम्झना बिर्सना’ पूजा-आकाशको सम्बन्धसँग निकै निकट रहेको समेत अनुमान गरेका छन् । फिल्ममा खास के छ ? त्यो भने निर्माण पक्षले खुलाउन चाहेको छैन । ‘फिल्ममा के छ, जान्नका लागि पूरा फिल्म नै हेर्नुुहोस्,’ निर्देशक निमेषले दर्शकलाई अनुरोध गर्नुभएको छ ।