ललितपुर, चैत्र १७। सावन देव श्रेष्ठ नेपाली सांगीतिक क्षेत्रमा नयाँ नाम भने पक्कै हैन । सन् २००२ मा सांगीतिक समुह 'ब्ल्याक हक' मार्फत स्रोता माझ झुल्किए । हुन त यो समयलाई नेपाली सांगीतिक फाँटमा पप, रकको स्वर्णिम युगका रुपमा पनि लिन सकिन्छ। त्यो ताका धेरै नयाँ प्रतिभावान कलाकारहरुको उदय पनि भएको हो ।
सो समयमा ब्याण्डको नामसँगै आफ्नो नाम पनि जोड्ने क्रम सुरु हुँदै थियो जस्तै रबिन एण्ड लुजः, राजु लामा एण्ड मंगोलियन हर्ट आदि । त्यही समयताका नै 'सावन देव एण्ड ब्ल्याक हक'को सांगीतिक यात्रा सुरु हुँदै थियो । केही समय पश्चात् सावन देवले आफ्नो सोलो यात्रा पनि सुरु गरे 'भन्थ्यौ तिमी बोल'को गीतको साथमा ।
सन् २००२ मा उदय भएसँगै 'एक विश्वास बोल'को गीतले सावन देव एण्ड द ब्ल्याक हकले स्रोता दर्शकको विश्वास जित्न सफल रह्यो । र निरन्तर रुपमा अघि बढिरहेको पनि छ। संगीतमा लाग्दा आफ्नो समयकालमा समाजमा संगीतप्रतिको नकारात्मक सोच, संघर्षरत हुँदा आर्थिक अभावलाई सावनदेवले पनि नजिकबाट नियालेका थिए । जीवनको आरोह अवरोहमा पनि कैंयौ आँधिबेहरीलाई झेल्दै उनको यात्रा निरन्तर रुपमा अगाडि बढि नै रह्यो । वि.सं. २०७२ को महाभूकम्पले तहसनहस पारेको त्यो समयमा कति त्रासमा थिए त कति अन्योलमा । यस्तै अन्योलतामा एक सोच पलायो । र जन्म भयो 'स्टुडियो रेड लुभु'को ।
स्टुडियो खोले लगत्तै नयाँ काम नयाँ उर्जाको साथमा अघि बढ्दै स्थापनाकालदेखि हालसम्म सयवटाभन्दा बढि अडियो तथा भिजुअल ल्याइसकेको छ स्टुडियो रेड लुभुले । आफ्नो संघर्षशिल यात्रा त उहाँले भुल्ने कुरै भएन र अहिलेको तात्कालिन सांगीतिक फाँट पनि त्यति सजिलो पनि छैन । पहिले जस्तो जेनतेन रेकर्ड गरी रेडियो, टिभिमा बज्ने वा क्यासेट, सिडि बिक्री हुने समय पनि छैन तर नवप्रतिभाहरुको जन्म हुने क्रम त पक्कै रोकिएको पनि छैन । कति प्रतिभाहरू सहि स्थानमा नपुग्दै हतोत्साही भएका पनि नदेखेका हैनौ । अब यस्ता प्रतिभाहरूलाई कसरी उजागर गर्ने भन्ने सोचमा एउटा उक्ति पलायो । एकस्टिक सिजन १ को । र आव्हानको माग गरे सामाजिक सञ्जाल फेसबुक मार्फत ।
स्टुडियो रेड लुभुले नव संगीतकर्मीहरुको लागि अवसरको सिर्जना गर्यो एकस्टिक सिजन १ को । जहाँ इच्छुक व्यक्ति वा समुहले आफ्नो एक मिनेटको भिडियो स्टुडियो रेड लुभुमा उपलब्ध गराउँनुपर्ने र उक्त गीत चयनमा परे स्टुडियो रेड लुभुले आफ्नै खर्चमा उक्त गीतको रेकर्डिङ्ग, एरेन्जमेन्ट, मिक्सिङ, मास्टरिङ्ग र भिडियो गरिदिने बताएको छ । उक्त गीतको कपिराइट भने ६ महिनासम्म स्टुडियो रेड लुभुसँगै रहनेछ । ६ महिनापश्चात् सो गीतको सर्जकसँगै रहने कुरा स्टुडियो रेड लुभुका सञ्चालक सावनदेव श्रेष्ठले जानकारी दिनुभयो ।
एकस्टिक सिजन १ को यो आव्हानमा कुल पच्चिस नवप्रतिभाहरु छनौट भैसकेका छन् भने हरेका बिहिबार एक नयाँ प्रतिभाका नयाँ सिर्जना स्टुडियो रेड लुभुको युट्युबमा रिलिज हुँदै आइरहेको छ । राजन महर्जनको सम्झनाको बोलको गीत आज बिहिबार मात्र सार्वजनिक गरेको छ । राजन महर्जनको यो गीत स्टुडियो रेडको छैठौं प्रस्तुती हो । थप जानकारीको लागि स्टुडियो रेड लुभुको फेसबुक https://www.facebook.com/redstudiolubhoo मा जान सक्नुहुनेछ ।
