काठमाडौं, चैत्र २४। यही चैत्र २६ गते स्टार हस्पिटल तथा कुटुम्ब ब्याण्ड सहित विभिन्न कलाकारहरुको प्रस्तुतिसँगै नि:शुल्क स्वास्थ्य शिविर संचालन हुन गइरहेको छ। ललितपुरस्थित पिम्बाहाल पोखरीमा आयोजना हुने उक्त कार्यक्रम बिहान १० बजेदेखि सुरु हुनेछ । ऐतिहासिक पिम्बाहाल पोखरी जसलाई पिम्बाहः पुखुः भनेर पनि चिनिन्छ ।
त्यसैगरी कुटुम्ब ब्याण्ड हाम्रो संस्कार र संस्कृतिको जगेर्ना गर्दै बिगत साढे दुई दशकदेखि नेपाली सांगीतिक क्षेत्रमा मात्र सिमित नभई लोप हुन लागेका बाजा, संगीत र मौलिकताको पनि जगेर्ना गर्दै आइरहेको छ।
कुटुम्बका ब्याण्ड सदस्य पवित महर्जनका अनुसार स्टार कुटुम्ब (फो जी) क्याम्पको यो दोश्रो संस्करण हो, जहाँ तपाइले पेटसँग सम्बन्धित (जी आई एण्ड ग्यास्ट्रो), स्त्री रोग (गाइनोकोलोजी), बुढाबुढीको स्वास्थ्य (जेरियाट्रिक), र सामान्य जाँच (जनरल हेल्थ)को सेवा पाउन सक्नुहुनेछ । साथै नि:शुल्क औषधीको पनि व्यवस्था गरिएको छ ।
यस स्वास्थ्य शिविरमा आउनुभएका सम्पूर्ण बिरामीहरुलाई सानेपास्थित स्टार हस्पिटलका विभिन्न सेवाहरुमा आकर्षक छुटको पनि व्यवस्था गरिएको उहाँले बताउनुभयो । साथै यस निःशुल्क शिविरमा आइ वरिष्ठ चिकित्सकहरुसँग प्रत्यक्ष अन्तरक्रियाको फाइदा उठाउन उहाँले सबैलाई आव्हान पनि गर्नुभएको छ ।
