काठमाडौं, वैशाख २। नयाँ वर्ष ०७९ को अवसर पारेर बिहीबारदेखि दरबार मार्गस्थित दरबार मलमा अत्याधुनिक सुविधा सम्पन्न मल्टिप्लेक्स सिनेमा हल ‘दरबार सिनेम्याक्स’ संचालनमा आएको छ ।

विगत अढाइ दशकदेखि ग्वार्काेमा गुण सिनेमा हल संचालन गरिरहेको गुण ग्रुपकै स्वामित्वको ‘दरबार सिनेम्याक्स’ को व्यवस्थापन भने क्युएफएक्सले गरेको छ । ५० र ५३ सिट क्षमताका दुईटा हलमा अत्याधुनीक प्रविधिका साउन्ड सिस्टम, फोल्डिङ सिट र स्क्रिन जडित छन् । ‘दरबार सिनेम्याक्स’ का प्रबन्ध निर्देशक दीप्रश शाक्यले दर्शकले हलमा आफ्नो इच्छा अनुसार सिट फोल्ड गरेर फिल्म हेर्न पाउनुका साथै अर्डरअनुसार सिटमै खाना तथा वार सेवा समेत उपलब्ध रहेको जानकारी दिनुभएको छ ।

गुण ग्रुपका प्रमुख राजेन्द्र (दिजेन्द्र) शाक्य, प्रबन्ध निर्देशक दीप्रश लगायत शाक्य परिवारले पूजाआजा गरी हलको शुभारम्भ गरेका थिए । कार्यक्रममा फिल्म निर्माता छबिराज ओझा, पत्रकार प्रकाश सुवेदी, टीकाराम नेती, चलचित्र पत्रकार तथा निर्माता, निर्देशक लक्ष्मण सुवेदी लगायतका व्यक्तित्वको उपस्थिति थियो ।

प्रबन्ध निर्देशक शाक्यले दर्शकको रुचि, सुरक्षा, गुणस्तरीय प्रविधि र सुबिधालाई ध्यानमा राख्दै लक्जरियस हल संचालनमा ल्याइएको बताउनभुयो । ‘ए मेरो हजुर–४’ र ‘केजीएफ–२’ बाट औपचारिक प्रदर्शन थालिएको पहिलो दिन बिहानको शो देखिनै दुवै हल हाउसफूल भएको जानकारी उहाँले दिनुभएको छ ।