काठमाडौं, जेठ १०। हास्य कलाकार केदारप्रसाद घिमिरे माग्ने बुढाको निर्देशनमा रहने हास्यव्यङ्ग्य टेलिभिजन कार्यक्रम ‘कमेडी हब जेठ ११ गते बुधबारदेखि हरेक हप्ता प्रसारण हुने भएको छ । सोमबार काठमाडौंमा आयोजित पत्रकार सम्मेलनमा शोका विषयमा औपचारिक जानकारी गराइएको हो ।
युवा हास्यव्यङ्ग्य कलाकार राजाराजेन्द्र पोखरेलको परिकल्पना रहेको टेलिभिजन कार्यक्रम एपि वानबाट हरेक बुधबार बेलुका ८ बजे पश्चात आउने भएको छ । कलाकार मदनकृष्ण श्रेष्ठ र हरिवंश आचार्यसहित हास्य विधाका चर्चित कलाकारले यस कार्यक्रमको शुभारम्भ गर्नुभयो । कार्यक्रममा महजोडीले सोको सफलताको लागि शुभकामना दिनुभयो ।
अभिनेता दीपकराज गिरीले पछिल्लो समय नेपालमा हास्यव्यङ्ग्य विधालाई रुचाइन थालिएको बताउनुभयो । अभिनेता मनोज गजुरेलले हँसाउनु, सामाजिक सन्देश र एकताको सन्देश दिनु कमेडीको उद्देश्य रहेको बताउनुभयो । अभिनेता जितु नेपाल मुन्द्रेले पछिल्लो समय टेलिभिजन हेर्ने बानी कम भएको भन्दै अहिले दर्शकले टिभी नभएर टिभीले दर्शक हेर्ने परिस्थिति आएको भन्दै ठट्टा गर्नुभयो ।
एक दर्जनभन्दा बढी नयाँपुस्ताका कमेडी कलाकारलाई लिएर मिडिया हबले कार्यक्रम निर्माण गर्न लागेको हो । कार्यक्रममा माग्ने बूढा, राजा राजेन्द्र पोखरेल र हिमेश पन्त, सुबोध गौतम, राजेन्द्र नेपाली लट्टे, जानुका पौडेल प्याकुली, दिलीप तामाङ हुरहुर, खड्ग बहादुर पुन खबपु, प्रभात लामा, संगम राई लब्ली, नारिया गिरी, राधिका कँडेल, बेदना राई मैना, सीता न्यौपाने, अनिल राई आम्बो, दीपेन्द्र प्रसाईं, कल्पना खतिवडा र दीपेश घिमिरेले कमेडी पस्कनुहुनेछ ।
भिडियो लिंक
https://www.youtube.com/watch?v=dubxEkhTOpY&t=1s
