काठमाडौं, जेठ १३। काठमाडौं महानगरपालिकाका नवनिर्वाचित मेयर बालेन्द्र शाह (बालेन) ले यो विजयभन्दा पनि कार्यको सुरुआत भएको बताउनुभएको छ ।

शुक्रबार बिहान बधाई तथा शुभकामना कार्यक्रममा सम्बोधन गर्दै साहले आफूले निर्वाचनको परिणामलाई एउटा सुरूवातको रूपमा लिएको बताउनुभएको हो । मेयरमा विजयी भएलगत्तै साहले आफ्नो भिजन र एजेन्डाहरूलाई पूर्ण रूपमा कार्य सम्पन्न गर्ने तथा काठमाडौंलाई विश्वकै सुन्दर र उत्कृष्ट नगर बनाउने प्रतिबद्धता जनाउनुभएको छ ।  

'आजबाट हामीले एउटा सुरुआतको रूपमा लिएका छौं । अबको ५ वर्षमा आफ्नो भिजन र एजेन्डाहरूलाई पूर्ण रूपमा कार्य सम्पन्न गर्ने हाम्रो धारणा रहेको छ । हामी सबै मिलेर अब काठमाडौंलाई देशको मात्र नभएर विश्वकै सुन्दर र उत्कृष्ट नगर बनाउन सबैले सहकार्य गर्नेछौं भन्ने आशा राखेका छौं।’ उहाँले भन्नुभयो ।